سمرا يام عيون وساع

سمرا يامّ عيون وساعْ .. والتنورة النيليِّة

مَطرَحْ ضيِّقْ ما بيساعْ .. رح حطِّك بِعينيِّي

 

يا عيني عَ هالعينين .. الْـ عَ دِنْيِةْ ورد انْفَتحوا

كيف ما الْتَفْتُوا عالمَيْلَين .. قلوب قلوب بيندبحوا

في نَجم بْلَفْتاتِك ضاعْ .. حكْيِت عنِّك غنَّيِة

وسحرك يللي ما بْيِنْبَاعْ .. مْبَكّي الوردِةْ الجُوريِّة

 

لِمْ بِتْكُوني حَدِّي بشوفْ .. الدنيي مْزارِع ورد وفلّ

جُوانِح تعبانة ورفوفْ .. حْساسين تْزَقْزِقْ وتطلّ

ولمّا الأسرار بتنذاعْ .. وبزعل من شِي خبرية

بتقوليلي ارْجاع ارْجاع .. ومدري شو بيصير فيِّي

 

جلسِة لِنا وعَالحُبّ مِجتِمْعِينْ

وتْنَيْنِنَا عالمقعد مْجانينْ

وِكْ قَرّبي صَوبي تَ نحكي شوي

عيونك وقلبي وسرّ هالحلوين

 

مْبَارحْ كانِتْ عم بتقولْ .. عصفورةْ لْإختا بالسرّ

شالِك يا سمرا مَغزولْ .. من لون الزهر المخضرّ

خلّيني بْعَيْنَيْكِ شْراعْ .. قاصِدْ مِينا منسيِّة

وِانْ شي مرَّة الزنْبَق شاعْ .. خبِّيلي منّو شويِّة