بدنا نكمّل

-غربِة

-هدَّتكُن الإشاعات

-فاجَأِتنا يا غربِة

-لما ودّعتوا اليأس ولَفَحِتكُن ريح الشمس

ورجعت إيدَيكُن تبني وتعمّر

صَوت عيادكُن خزَّق سَمعهُن

فرَح معاولْكُن بالأرض بشَّرهُن بِهَدم براجُن

حبّوا يردّوكُن عَاليأس

 

-عم بيقولوا بدُّن يعتقلوا ناس كتير

-لا تخافوا ما في حبوس تساع كل الناس

بيِعتقلوا كتير بيبقى كتير، وبِاللي بيبقوا رح منكمّل

غمر الطّوفان الأرض ورجّعوها اللّي بقيوا

هدَمِت الحروب المُدُن وعمّروها اللّي بقيوا

استعبدوا الظلّام الناس حرّروهُن اللّي بقيوا

بدنا نكمّل المشوار

قلال، يكون منكمّل بلِّلي بقيوا

-بدنا نكمّل بلِّلي بقيوا

كتار قلال يكون شو همّ

منكمّل بلِّلي بقيوا

-كتار قلال منكمّل باللي بقيوا

 

يا هالنّاس يا أهلي

أنا وبالأرض الغريبة

همومكُن كانِت توصلّي

بِكي ولادكُن باللّيل كان يصرِّخلي

أنا وبالأرض الغريبة حزنكُن رِبِي معي

حزنكُن حَفَظْني حرَسْني كبَّرني وحزنكُن رجَّعني

لوّحلي من الغيم، حاكاني من الصيف

ندهني من تمّوز، من ذلّ الإنتظار بالمُدُن الغريبة

و كانِت أصواتكُن تندَهلي