رح حلّفك

رح حلّفك بالغصن يا عصفور

بالورق بالفيّ بالنبعات

بِالْـ زَيّح جناحك بريشة نور

بِالْـ مَرْجحك مع زرقة النسمات

 

بتطير يا عصفور

عَ كوخ من وزّال

غويان سقفو زهور

مفروش بالعنبر

وحبّ الندي الأخضر

دنيي ظلال ظلال

 

تقشع عريشة وباب

بفيِّتا مزوي

وحلوة بإيدا كتاب

سلّم على الحلوة

وِانْ هديِتْ رياحك

بتمرمغ جناحك

عالسطح عالحيطان

عَ تياب مدريّة

عالبسط عالقمصان

عَ كل شي تخزّق

عالمقعد الأزرق

عَالقمر السكران

الْـ بِيْذَكّرَا فيِّي

 

وِانْ كان ما في شي

من حبّنا باقي

بتسكّت الساقي

يا طير وبتمشي

وبتغطّ تحملّي

يا من هِك التلة

يا من هداك الغاب

شي ذكر شي قشّة

ومن خَرْطَشة دَيْها

من تحت إجريها

شي نقدتين تراب