من يوم تغربنا



من يوم تغربنا وقلبي عم بِيلمّ جراح

يا ريَتا بتخلص هالغربِة تَ قلبي يرتاح

 

يا ريت منرجع نتلاقى.. وتفرح فينا الدّار

وقلوب الكانِت مشتاقة.. لا تحنّ ولا تغار

يا نار الفرقة الحرّاقة.. شو قسيتي يا نار

رسايلنا اللّي حرقتي وراقا.. صارت بلا جناح

 

يا ريت الراحوا وتركونا.. ما ينسوا اللّي كان

ان نسيوا اللّي كان بينسونا.. وبيصير الزّمان

حلوة سرقوها من جفونا.. ليالي نيسان

وما بتقدر لا تشوفو عيونا.. ولا تنسى اللّي راح

 

أصعب من إيّام الفرقة.. من اللّيلات السّود

إنّك ترجع لا في ملقى.. ولا حبّ ولا وعود

غير الماضي إلي ما بيبقى.. يا ريتُو بِيعود

وإسرق وجّك منّي سرقة.. وخبّيك وإرتاح