كتابة وموسيقى:
الأخوين الرحباني
بْعَلْبَكْ تْهَدَّمِت
والآلِهَة رَح يهجرُوها
وعَ الدراجْ،
تِخْمِين شو في عَ الدراجْ
حْكَايِةْ رَحيلْ
وقصِّةْ البْعَلْبَكِية

صوت الريح
والرحلة عم تنْدَهْ
شْماليِّة الريح
والرحلة عم تنده
صوت الريح والرحلة تندَهْنا
شْمالية الريح والرحلة تندَهْنا
يا شْراع الليل عَ مواج غْيوم
وَدِّينا وَدِّينا للدنيِة الْـ كِلّا نْجوم
شمالية الريح شمالية الريح
والبوق الهادر كِلُّو تجريح
شمالية الريح والطير يصيح
شمالية الريح والرحلة عم تنده
عم تنْدَهْ عم تنْدَهْ

- وإنتِ يا بْعَلْبَكِيِّة صوتِك غنِّيةْ

ورح ناخدِك مَعنا بِرحلتنا البَهيِّة

- خَلُّوها

- بدنا ناخدها

- اتْركوها

- بدنا ناخدها

- منحلّفكُن بمْحَبِّتنا إلكُن

بالشمس اللي إنتو منها
بالرهبة اللي بْهَياكلكُن

- خلُّوها عِنّا اتْركوها عِنّا

البْعَلْبَكية
صَوتا إلنا وهِيِّة مِنّا
البعلبكية

- رح ناخدها

ذِكر من الأرض ونسعدها
بقصور من المَرمَرْ بنهُورِة الكَوثرْ
تغنّي عَ شبابيك نْجوم وتسْكَرْ

- بس هِيِّة هَون ربْيِتْ عالبيادرْ

صوتها من لَون فَيِّة القَناطرْ

- ويا ألف سهريِّة وليلة قمريِّة

ضوّاها بْحَنِينو صوت البْعَلْبَكية

- صوتها بيضيع بهالوحشِة الطويلِة

خلِّيها ترحل معنا للدنيِة الجميلة

- لا زهر الطريقْ .. لا النبع الْـ عم يسأل

ولا الطاحون العتيقْ .. بيخلِّيها ترحل

- هَي غَلِّة أراضينا وغنِّية لَيالينا

هالْـ نحنا ويّاها ببْعَلْبَك رْبِينا

- بْعَلْبَك تعبِتْ ضجرِتْ وقعِتْ

ودْراجا ركعِتْ
رجعِتْ للأرض لْإمَّا الأرض
ترابْ وصخورْ
وببال الغْبارْ صارت حْجارْ

- بس الكلمة الْـ بتغَنِّي بترَجِّع مجد بْعَلْبَك

بتزهِّر بتعمِّر وبتعَلِّي العْمارْ
الغنِّية بتخَلِّي الحْجار مَنّا حْجارْ

- مَعنا يا صبيِّة .. مَعنا ويطِيب المَلْقى

وتشيع الغنِّية .. بقصور الفجر الزرقا
رَحلِة ولا أجملْ .. بْشراع قْلوعو غَيمِة
يطِير فينا وينزَلْ .. عَ جبال قبال النجمة
بْحَيراتها عم تُوعى .. وقْمار ما بتغيبْ
بالفرح مزروعة .. ومزروعة بالطِيبْ
بهالرَّحلة الحلوة مَشِّي معنا يا حلوة
مَشِّي معنا يا حلوة

- رحلِتْها أحلى هَون

رحلة ع بيوت الناس
رحلة ع قلوب الناس
بِقناطر ورد ولوز
خَلِّيها تنزَل عالغَبرة
ونعمّرها دنْيِة خضرا
ونشيل بعلبك من أمسْ
ونشقَعْها فوق الشمس

- شراع الرحلة المجنَّح ناطرنا وبدو يطير

- والدمعة بعينينا

- عم تندَه وتْلَوّحلِك مَشَالح الحرير

- شالك غَزْل إيدينا

- إنت الْـ بتقولي قُولي

بتروحي مَعنا؟

- خَلِّيكِ عِنّا

- بتروحي مَعنا؟

- خَلِّيكِ عِنٍا

- قُولي

- قُولي، قُولي

كلمات أغاني فيروز - فيروزيّات

2006 - 2022

صُنِع بالـ♥