جلنار

يا صبح رَوِّج طَوَّلت ليلَك .. خَلَّيت قلبي نارْ
بلكي بتجي إختك تْغَنِّيلَك .. بلكي بتجي جِلنارْ

صرخات عم بتمُوج بالوادي .. مْعَنْزَقْ عليها ضْبابْ
لبعيد عم بتروح وتنادي .. بيظهر حبيبو غابْ

راعي بِكي ومِنْجَيْرتو متلو .. بِكْيِتْ تَ يتسلّى
شو قَولكُن عالسَّكت قالتلو .. وشو قولكُن قَلّا

خَلِّيك حَدّي تَ يْروق الجَوّْ .. ورَنْدِح وسمِّعني
ولِمِّن بيطلَعْلَك يا راعي الضَوّْ .. تبقى تْوَدِّعني

وقَّفتْ قلبي عالدرب ناطور .. تَ فاق ألف نهارْ
وعْيِتْ الشمس وزقزق العصفور .. وما إجِتْ جِلنارْ