بتشوف بكرة بتشوف

كلمات وألحان:
الأخوين الرحباني
بحْياة عَينك يا ورد نِيسان .. زَهِّر على شبّاكُن العشقانْ
وِانْ كان بدُّن يسألوا عَنّا .. جيران قلُّن بَعِدْنا جيران

بتشوف بُكرا بتشوف .. شو دارنا حلوة
عَ مْطلّ أخضر مكشوف .. والشمس بتضْوِي
فراشات بتْجِينا رفوف .. وطيور تقصدنا ضيوف
وغصون ترقُص وتغَنّي بتشوف بكرا بتشوف

وإنت تطلّ .. ونقلَّك أهلا
وهيك تغلّ .. نسمة على مهلا
وعيونْنا ترفّ وتحكي
وقلوبنا تبوح وتشكي
ومروج بالحب نطُوف
بتشوف بُكرا بتشوف

فوق شو هَمّ .. منعيش بجنِّة
وشوق يلمّ .. نَهْدات ويغَنّي
وعْباب خَضرا محنيِّة
عَ قْباب متل العلّيِّة
وبْوَرد سطحا مَسقوف
بتشوف بُكرا بتشوف

وهاك الدنِي الغَضَّة .. بتضلّ حليانِة
فيها الهَوى بيمضى .. أحلام وغْناني
والحبّ فوق دْواليها
عناقيد حليانِة فيها
ومافيش واحد مقطوف
بتشوف بُكرا بتشوف